تحذير من التعامل مع معرض علام اوتوموتيف فرع الماظه مصر الجديدة للسيارات
معلش البوست ممكن يبقى طويل كنت بشتري سيارة سكودا اوكتافيا منهم البداية اصريت اتفق معاهم على سعر قبل مروح عشان مضيعش وقت وعشان مش معايا عربية حاليا ومكانهم بعيد بالنسبالي مراوغة كتيرة في الكلام لحد محددو السعر الي قولت عليه واكدو عليا العربية موجوده رحت ليهم طلع ان العربية مش موجودة وجابو ليا واحدة مينفعش اخدها بس عشان اتفرج عليها قولت مش مشكلة ادفع مبلغ واحجزها وتاني يوم هتيجي وعديت النقطة دي بداية المشاكل من البنت السيلز مضايقة مني مش عارف ليه يعلم ربنا بتعامل معاها بوضوح واحترام وهدوء مش متقبلة اي طلب او كلام مني مأزماني مش عارف ليه اي طلب او حاجة تقولي هو احنا هنضحك عليك مثلا عشان بقولها ابعتيلي صورها على الواتس اما تيجي العربية وعلكول مستغربة ومش متقبلة اي كلام مني عديت كل ده عادي اتصلو بيا قالولي تعالى العربية وصلت
حصلي موقف قبل مروح ليهم معرض من المعارض الي كنت مكلمهم لما عرف اني حجزت بخمس الاف جنيه جاب ليا سعر اقل خمس الاف وقالي فلوس الحجز الي عند علام اعتبرها هدية مننا ليك رفضت طبعا لأنه عيب وحرام مهما كان احنا اتفقنا وخلصنا ولا يبيع احدكم على بيعة اخيه لما مرضتش اقول الموقف ده للسيلز على الفون
روحت معرض علام عشان ادفع ومعايا الفلوس كلها كاش بقول للبنت بمنتهى الهدوء والاحترام انا حصل معايا موقف كذا كذا مع معرض معين هيعملي خصم زيادة خمس الاف انا متعشم تحاولي تعمليه ليا وكده كده انا ملتزم بكلمتي معاكم بس هيبقى موقف لطيف بالنسبالي منكم وهكون مبسوط ومش اخر تعامل وبفضل الله كل سنة او اقل انا بغير العربية واثبت ليها كل كلامي دخلت فيا شمال قالتلي انت عايز ترجع فلوسك ارجعهالك قولتلها ده الي فهمتيه ولو انتي مش فارق معاكي انا كمان مش هتمسك بيكم المهم راحت للمدير جه قعد معايا نفس الكلام احنا ده اخرنا وعايز تاخد فلوسك خدها قولتله انا مش هصغر نفسي ولا هرجع في اتفاقي عشان خمس الاف جنيه يالله توكل على الله طلعوني الحسابات عشان ادفع بعتو معايا عامل له كل الاحترام مني والتقدير عكس مكنت بدفع العربون البنت كانت معايا وخلصت مع المحاسب كل تفاصيل الحجز طلعت غرفة صغيرة قاعد اكتر من نص ساعة سامع المحاسب بيتكلم مع واحد معاه بعت كذا حد عشان يستعجله لأن المبلغ كبير وهناخد وقت في عد الفلوس ومعايا اسرتي تحت واطفال منتظرين محدش عبرني خدت بعضي ومشيت ساعتها كذا موظف طلع ورايا ومعلش وحقك علينا وظهر ليا موظف قالي انا الي كنت قاعد مع المحاسب معلش حقك عليا انا كنت بخلص معاه شغل مهم تجاوزت الي حصل ودخلت غرفة الخزينة عشان ادفع طبعا انا مضايق الموظف ولا بص ليا اساسا ماسك موبايله بيكتب فيه فتحت الشنطة وبدأت اطلع الفلوس وجنابه مش شايفني اصلا فبقوله هو حضرتك مش هنخلص ولا ايه مش كفاية منتظر بره بقالي نص ساعه قسما بالله ربنا شاهد عليا لاقيت صوته علي عليا وبيشوح ليا بأيده بيقولي اعملك ايه يعني معايا عميل طبعا مش حقيقي عشان كان معاه موظف زميل وهو زميله الي اكد عليا بنفسه قولتله بكل هدوء انت بتزعقلي انا وبتشوح ليا كمان راح عايد نفس الكلام قولتله انا مشفتش كده في حياتي ابدا راح مزعق تاني وقالي امشي العميل عشانك او اطرده حاجة زي كده يعني مثلا ولا ايه رحت معلي طبعا صوتي وقولتله الي معاك ده مش عميل ده زميلك وهو اعتذر ليا بنفسه وانا الي غلطان ان اديتك فرصة تطاول عليا وخدت طبعا الشنطة والفلوس ونزلت المعرض تحت لاقيتهم منتظرين المدير وكذا حد فبقولهم رجعلي فلوس الحجز انا غلطان اني اتعاملت معاكم المدير بيتعامل معايا بمنتهى الامبالاه حتى بعد معرف الموقف وموظف من عندهم قاله ياريس حصل فعلا الكلام الي بيقوله من المحاسب ولا كان ليه رد فعل حقيقي تعالى بس كل همهم ارجع ادفع الفلوس وامشي عشان يكملو ال deal وخلاص ولا حاول ياخد اجراء او شيء طبعا اصريت اني ارجع فلوس الحجز وبالفعل رجعوها بس ضيعو وقتي ومجهودي واربع مرات رايح جاي ليهم ب اوبر لا انصح احد بالتعامل معاهم بالنسبالي لو هما ارخص معرض في الدنيا فاحترامي وكرامتي لنفسي يجبروني مهينش نفسي معاهم بعتذر على الاطالة
اترك تعليقا:
